رویدادهای داخلی

عبدالله به تاجیکستان رفت

افغان رادیو، کابل: عبدالله عبدالله، رییس اجرایی حکومت وحدت ملی، پس از چاشت روز جمعه، بیست‌وچهارم جوزا در یک سفر رسمی کابل را به مقصد دوشنبه، پایتخت تاجیکستان ترک کرد. هدف از این سفر آقای عبدالله اشتراک در پنجمین نشست سران کشورهای عضو کنفراس تعامل و اعتمادسازی در آسیا (سیکا) خوانده شده است.

 عبدالله عبدالله در این نشست به نماینده‌گی از افغانستان شرکت می‌کند. ریاست اجرایی با نشر خبرنامه‌ای گفته است که  آقای عبدالله یکی از سخنرانان این نشست خواهد بود. به نقل از خبرنامه، رییس اجرایی در سخنرانی خود درباره حمایت از تلاش‌ها و برنامه‌های سیکا در آسیا، همکاری‌های بیش‌تر میان اعضای سازمان، هم‌گرایی منطقه‌ای، مبارزه مشترک با دهشت‌افگنی و مبارزه با کشت، تولید و قاچاق مواد مخدر تأکید خواهد کرد.

هم‌چنان ملاقات با رییسان جمهور تاجیکستان، ترکیه، ایران، جمهوری قزاقستان، نخست‌وزیر آذربایجان و تعدادی از رییسان سازمان‌های بین‌المللی نیز در برنامه سفر آقای عبدالله به تاجیکستان قرار دارد.

نشست سران کنفرانس تعامل و اعتمادسازی در آسیا (سیکا) هر چهارسال یک‌بار به اشتراک سران ۲۷ کشور عضو، هشت عضو و سازمان بین‌المللی ناظر برگزار می‌شود. میزبان نشست امسال سیکا تاجیکستان است.

به نقل از خبرنامه ریاست اجرایی، سران دولت‌ها و حکومت‌های کشورهای عضو و ناظر سیکا قضایای مهم منطقه‌ای و بین‌المللی را در نشست امسال‌‎شان مورد بحث قرار خواهند داد.

برچسب ها

مطالب مشابه

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

دکمه بازگشت به بالا
بستن