ده‌ها نفر در پی شورشی در یک زندان در تاجیکستان کشته شدند
در پی شورش افراد داعش در زندانی در تاجیکستان، سه زندانبان و ۲۹ زندانی کشته شدند.
وزارت عدلیه تاجیکستان روز دوشنبه اعلام کرد که این شورش در زندانی در شهر «وحدت» در ده کیلومتری شرق دوشنبه، پایتخت این کشور، رخ داده است.
گفته شده است که زندانیان عضو داعش با چاقو بر محافظان زندان حمله کرده و سه تن از آن‌ها را کشته‌اند. پنج زندانی نیز توسط این افراد در این شورش به قتل رسیده‌اند.
در پی شورش زندانیان داعش و قتل زندانیان و محافظان زندان، نیروهای امنیتی دست به کار شده و ۲۴ زندانی داعش را کشته‌اند.
وزارت عدلیه تاجیکستان گفته است که در حال حاضر امنیت در این زندان به حالت عادی برگشته است.
زندان شهر وحدت در تاجیکستان زیر تدابیر شدید امنیتی اداره می‌شود. در این زندان، یک‌ونیم هزار زندانی به شمول زندانیان وابسته به داعش به سر می‌برند.
به گزارش یورونیوز، جنگ‌جویان داعش سال گذشته نیز مسوولیت یک شورش دیگر در زندانی در تاجیکستان را برعهده گرفته بودند. هم‌چنان این گروه مسوولیت حمله ماه جولای گذشته بر گردشگران خارجی در این کشور را پذیرفته بود. شمار تلفات این حمله چهار تن اعلام شده بود.
