افغانستان

رییس‌جمهورغنی با رؤسای جمهور تاجیکستان و ازبیکستان دیدار کرد

رییس‌جمهورغنی با رؤسای جمهور تاجیکستان و ازبیکستان دیدار کرد در یک خبرنامه‌یی ریاست‌جمهوری آمده‌است که رییس‌جمهورغنی در حاشیۀ نشست شانگهای، با رییسان جمهور تاجیکستان و ازبیکستان، نیز دیدار و گفت‌وگو کرده‌است.

رییس‌جمهورغنی، در حاشیۀ نشست شانگهای، پس‌از چاشت روز شنبه (۱۹ جوزا) در شهر چینگداو چین، با امام‌علی رحمان، رییس‌جمهوری تاجیکستان دیدار کرد.
رییس‌جمهور تاجیکستان، بر همکاری و مبارزه مشترک منطقه‌یی برضد هراس‌افگنی، تأکید کرد.

سران دوکشور روی تقویت و گسترش همکاری‌های دوجانبه و منطقه‌یی، به‌ویژه همکاری‌های اقتصادی، بازرگانی، امنیتی و مبارزه با هراس‌افگنی، گفت‌وگو کردند.

آقای رحمان، از روند صلح به رهبری دولت افغانستان و اعلام آتش‌بس یک‌جانبه با طالبان، پشتیبانی کرد و آن‌را برای تأمین صلح و ثبات در منطقه مهم خواند و تأکید ورزید که افغانستان با ثبات به‌سود همه کشورهای منطقه است.

ازسویی‌هم، رییس‌جمهورغنی نقش تاجیکستان را در همکاری‌های اقتصادی و ترانزیتی منطقه‌یی مهم خواند و گفت که تاجیکستان به‌عنوان صادرکننده انرژی برق و افغانستان به‌مثابۀ ترانزیت‌کنندۀ انرژی برق، نقش به‌سزای را در اتصال منطقه‌یی و پیش‌رفت اقتصادی منطقه دارند.

درهمین‌حال، او در یک دیدار دیگر با میرضیایف، رییس‌جمهوری ازبیکستان، دربارۀ تقویت مناسبات میان دوکشور و موضوعات منطقه‌یی، نیز گفت‌وگو کرد

آقای میرضایوف در این دیدار، گفت که با تحقق روند صلح نه‌تنها این‌که ازبیکستان با افغان‌ها کمک می‌کند، بل کشورهای دوست و بین‌المللی را هم تشویق می‌کند که افغان‌ها را در موفقیت این روند، همکاری کنند.
دوجانب دربارۀ همکاری‌های بازرگانی و اقتصادی گفتند که اکنون یک دیدگاه بزرگ اقتصادی موجود می‌باشد و روابط بازرگانی چین و افغانستان از طریق ازبیکستان، تقویت بیشتر خواهد یافت.
در این دیدار، میان دوطرف در خصوص آغاز کار پروژه‌های زیرساختی، مانند شبکه‌های انرژی برق و خط‌ آهن، بحث‌های تفصیلی صورت گرفت و فیصله شد که تیم‌های تخنیکی دوکشور به‌زودی نشست‌های کاری خویش را برگزار کنند

مطالب مشابه

دیدگاهتان را بنویسید

نشانی ایمیل شما منتشر نخواهد شد.

دکمه بازگشت به بالا